OAK: Urgjentisht të lirohet lënda e parë për prodhuesit

Ekonomi

OAK: Urgjentisht të lirohet lënda e parë për prodhuesit

Më: 7 janar 2019 Në ora: 14:55
OAK

Oda e Afarizmit të Kosovës kërkon nga Ministri i Tregtisë dhe Industrisë Endrit Shala, Ministri i Financave Bedri Hamza si dhe kryeministri i vendit Ramush Haradinaj që të lirojnë lëndën e parë për prodhuesit vendor ashtu siç është e paraparë me Ligj.

OAK përmes një komunikate për media thotë se arsyeja e kërkesës është ankesa e prodhuesve lidhur me lirimin nga TVSH-ja e lëndës së parë.

“Çdo fillim të vitit, prodhuesit vendor obligohen të aplikojnë në ATK për lirim nga TVSH-ja për lëndën e parë të importuar, ndërsa pas aprovimit të saj fillon edhe zbatimi në Dogana. Vitet paraprake shqyrtimi i kërkesave është bërë për një periudhë më të shkurtë kohore, gjë që nuk i ka penguar bizneset në vazhdim të prodhimit”, thekson OAK, derisa shton se këtë vit bizneset po përballen me probleme pasiqë për shkak të mos shqyrtimit të këtyre kërkesave lënda e parë ka mbetur pa kaluar në Doganë dhe si pasojë bizneset po detyrohen të paguajnë për qëndrimin e kamionëve dhe frigoriferëve në terminale dhe po krijojnë edhe pengesa në prodhim.

Oda e Afarizmit të Kosovës kërkon që të përkrahen prodhuesit vendor, duke ju lejuar që të bëjnë futjen e lëndës së parë në Doganë derisa të shqyrtohen aplikacionet nga ATK-ja.  

Gjithashtu, OAK kërkon që kjo procedurë të hiqet ashtu që të mos obligohen bizneset të aplikojnë çdo vit.

commentFirst article
Sot mund të lexoni Shfletoni kopertinat