Lluka informon delegacionin e Sfidave të Mijëvjeçarit rreth termocentralit “Kosova e Re” - Bota Sot
Lluka informon delegacionin e Sfidave të Mijëvjeçarit rreth termocentralit “Kosova e Re”

Ekonomi

Lluka informon delegacionin e Sfidave të Mijëvjeçarit rreth termocentralit “Kosova e Re”

Më: 20 shkurt 2019 Në ora: 09:54
Pamje nga takimi

Një delegacion i lartë i Korporatës Sfidat e Mijëvjeçarit kanë vizituar ministrin e Zhvillimit Ekonomik.

Ku është Kosova në sektorin energjetik dhe cilat janë hapat e mëtutjeshëm ishte pyetja e delegacionit të Korporatës Sfidat e Mijëvjeçarit (MCC), të kryesuar nga Karen Sessions, zëvendës presidente dhe Jonathan Brooks, zëvendës president i departamentit të operacioneve kompakte.

 Përfaqësuesit e MCC u pritën nga ministri Valdrin Lluka i cili i falënderoi për vizitë dhe i informoi rreth zhvillimeve në sektorin e energjisë, ku është gjendja dhe cilat janë hapat të cilat do të ndiqen në të ardhmen.

“Sektori energjetik në total do të ketë 3 miliard euro investime kushtuar energjisë në përgjithësi, energjisë efiçiente dhe asaj të ripërtrishme”, tha ministri Lluka.

Po ashtu, Lluka i informoi edhe rreth termocentralit “Kosova e Re”, zhvillimeve dhe ndikimit që do të ketë në ajër.

“Për sa i përket termocentralit të ri “Kosova e Re”, edhe pse do të ketë bazën prej qymyri do të investohet në të dhe do të ketë teknologjinë më të fundit e cila përpunon dhe filtron lëndën djegëse që të mos ketë ndotje të madhe”, u shpreh Lluka.

Karen Sessions, zëvendëspresidente e departamentit për marrëdhënie me jashtë, tha se sektori energjetik është prej programeve kryesore nga e cila do të përfitojë Kosova.

“Tash e sa vite MCC është e vendosur në Kosovë dhe është duke bërë studime për implementimin e programeve që parashihen dhe energjia është prej pikave kryesore që Kosova do të përfitojë”, u shpreh Sessions.

Në aspektin e zgjerimit rajonal në sektorin energjetik, kreu i MZHE-së, tha se është duke u punuar në krijimin e tregut të përbashkët mes Kosovës dhe Shqipërisë dhe nënshkrimit të memorandumit me Maqedoninë për krijimin e gazsjellësit.

“Jemi duke punuar në krijimin e tregut energjetik të përbashkët mes Kosovës dhe Shqipërisë mirëpo janë shfaqur probleme me Serbinë. Gjithashtu së fundi kemi nënshkruar marrëveshje me Maqedoninë për krijimin e gazsjellësit e cila do të kalojë nëpërmes Kosovës”, shtoi ministri Lluka.

Gjithashtu u diskutua rreth ajrit të ndotur në vend, ku Lluka sqaroi se shkaktari kryesor i ndotjes së ajrit, ashtu siç edhe ka treguar raporti i Bankës Botërore, është djegia e qymyrit për ngrohje në shtëpitë e qytetarëve të Kosovës. Si zgjidhje për këtë problem, Valdrin Lluka tha se është zgjerimi i kapaciteteve të ngrohjes lokale nëpër shtëpitë e banorëve të vendit.

Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...