Inflacioni mujor i matur nga indeksi i harmonizuar i çmimeve të konsumit ishte -0.2% në muajin maj 2019, ndërsa indeksi i çmimeve të konsumit pësoi rënie në një mesatare prej -0.2% në maj 2019, krahasuar me një muaj paraprak.
Sipas “Indeksit të Harmonizuar të Çmimeve të Konsumit” për muajin maj nga Agjencia e Statistikave të Kosovës, rënia shpjegohet me rënien e çmimeve të konsumit te nëngrupi i COICOP-it perime me 11.3%, me një ndikim të këtij nëngrupi prej -0.4% në IHÇK.
Rënia u neutralizua kryesisht nga ngritja e çmimeve të konsumit te nëngrupet e COICOP-it: bukë dhe drithëra (0.6%); pemë (4.4%); përdorim i pajisjeve për transportin personal (0.8%) - (ngritje e çmimeve të naftës dhe benzinës), me një ndikim të përbashkët të këtyre nëngrupeve prej 0.2 për qind në IHÇK.
Shkalla vjetore e inflacionit e matur në muajin maj 2019 në krahasim me muajin maj 2018 ishte 3.4%, derisa indeksi i çmimeve të konsumit është më i lartë për 3.4% në maj 2019 krahasuar me të njëjtën periudhë të vitit të kaluar.
Kjo shpjegohet me ngritjen e çmimeve të konsumit në këtë periudhë te nëngrupet e COICOP-it: bukë dhe drithëra me 12.9%, mish 4.7%, qumësht, djathë dhe vezë 3.4%, perime 21.6%, sheqer, reçel, mjaltë, çokollatë dhe ëmbëlsira 1.5%, kafe, çaj dhe kakao 3.5%, pije alkoolike 1.5%, etj.
Ngritja u neutralizua kryesisht nga rënia e çmimeve të konsumit te nëngrupet e COICOP-it: pemë me -7.9%, shërbime për transport -3.5% (rënie e çmimeve të biletave të transportit ajror) me një ndikim të përbashkët të këtyre nëngrupeve prej -0.3% në IHÇK.
