Nesër vendimi për kompanitë që dyshohen se kurdisën çmimet e derivateve - Bota Sot
Nesër vendimi për kompanitë që dyshohen se kurdisën çmimet e derivateve

Ekonomi

Nesër vendimi për kompanitë që dyshohen se kurdisën çmimet e derivateve

Më: 7 maj 2020 Në ora: 11:21
Ilustrim

Të premten do të shpaloset vendimi përfundimtar lidhur me dyshimet për manipulime me çmime nga kompanitë e derivateve të naftës.

Lajmin e ka bërë të ditur Autoriteti i Konkurrencës, përmes një njoftimi në faqen zyrtare. Konferenca do të mbahet në ish-objektin e Bankës së Lubjanës, kati i katërt, Rr. Migjeni në Prishtinë.

“Ju njoftojmë se të premten (08.05.2020), në orën 10, Autoriteti Kosovar i Konkurrencës do ta shpalosë vendimin përfundimtar lidhur me rastin që ka të bëjë me dyshimet për manipulime me çmime nga kompanitë e derivateve të naftës”, thuhet në njoftim.

Ndryshe, në muajt e fundit të vitit 2018 çmimet e larta të naftës në vend patën nxitur reagime të shumta të qytetarëve. Dyshimet ishin se kompanitë që operojnë në vend, kishin lidhur një marrëveshje të fshehtë për të ngritur çmimet. Por, atë kohë shoqata e naftëtarëve arsyetohej se në Kosovë çmimet ishin më të ulëta se në rajon.

Zhurma që ishte bërë, shtyu Autoritetin Kosovar të Konkurrencës që të fillojë hetimet për dyshimet se kishte ekzistuar kjo marrëveshje. Hetimet kanë përfshirë 16 kompani.

Shfaq komentet
comments powered by Disqus
Sot mund të lexoni Shfletoni kopertinat