Ministria e Financave ka anuluar konkursin për drejtor të Doganës, pritet të ri-shpallet shpejt

Ekonomi

Ministria e Financave ka anuluar konkursin për drejtor të Doganës, pritet të ri-shpallet shpejt

Më: 28 qershor 2020 Në ora: 11:01
Ministria e Financave

Ministria e Financave ka anuluar konkursin për zgjedhjen e drejtorit të përgjithshëm të Doganës së Kosovës.

Kjo Ministri paralajmëron se së shpejti do të ri-shpallet konkursi për këtë pozitë pasi që zyra ligjore e kësaj ministrie ka kërkuar që të mbyllet ky proces.

E për zëvendësministrin e Financave Agim Krasniqi ky proces është ndërprerë për të mos pasur implikime në kuptimin politik.

Krasniqi ka inkurajuar të gjithë kandidatët që kanë qenë në garë të ri-kandidojnë sërish, pasi që do të jetë një proces edhe më transparent.

Krasniqi: Konkursi për drejtor të doganës së shpejti do të ri-shpallet

“Për momentin është ndërprerë ky proces në mënyrë që të sigurohemi që të arrijmë marrëveshje me anglezët dhe me amerikanët që me ndihmuar këtë proces pa asnjë implikim apo intervenim në kuptimin politik dhe së shpejti, kjo do të rishpallet. Ne inkurajojmë të gjithë me konkurrua dhe i sigurojmë të gjithë se transparenca do të jetë e plotë dhe kushdo që e meriton me qenë aty do të jetë”, thotë Krasniqi.

Ai ka thënë se është me interes që dogana me funksionuar si duhet dhe me realizua planin e të hyrave.

Kraniqi: Anulimi është kërkuar nga Zyra ligjore

“Për neve është me interes që dogana me [IS1] si duhet dhe me realizua planin e të hyrave. Pra, inkurajojmë të gjithë me konkurrua, edhe ata që kanë konkurrua me vazhdua konkurrimin dhe të tjerët, t’u i sigurua që do të jetë një proces transparent, i mbikëqyrur mirë dhe pa asnjë implikim ose intervenim në kuptimin politik... Normal, është dashur ligjërisht, sepse zyra ligjore ka kërkuar që ky proces të mbyllet një herë dhe të fillon procesi prej fillimit”, thotë ai.

Kujtojmë se në prill ish-ministri i Financave, Besnik Bislimi kishte pezulluar konkursin për zgjedhjen e drejtorit të Doganës me arsyetimin e shfaqjes së pandemisë në vend.

Sikur disa institucione dhe kompani publike që kanë mbetur me ushtrues detyre të drejtorit të përgjithshëm, edhe Dogana e Kosovës është në këtë situatë, përkundër që konkursi për drejtor të Doganës ishte shpallur më 12 shkurt të këtij viti nga Ministria e Financave.

Ndryshe, ish-kryeministri në detyrë, Ramush Haradinaj, pak parase të lironte zyrën e kryeministrit, ia kishte vazhduar mandatin drejtorit të Doganës, Bahri Berisha.

Por, në ditët e para të qeverisë aktuale, kryeministri në detyrë Albin Kurti anuloi vendimin e Haradinajt për të mundësuar shpalljen e konkursit në mënyrë të rregullt.

Në konkursin e fundit të Ministrisë së Financave, për drejtor të përgjithshëm të Doganës së Kosovës, patën aplikuar 26 persona, prej tyre 11 janë zyrtarë të Doganës. Ndër aplikantët ishin edhe ish-drejtori Bahri Berisha dhe ushtruesi i tashëm i detyrës së drejtorit, Ibrahim Xhaka.

Mësohet se kandidatë për pozitën e të parit të doganës, kanë qenë Bekim Mehmetaj, Arlind Limani, Bastri Bardhi, Agim Nika, Irfan Fejzullahu, Bahri Berisha, Ibrahim Xhaka, Agron Llugaliu, Asllan Rrahmani, Gazmend Maloku, Skënder Neziri, Osman Neziri, Bashkim Arifi, Agron Sadiku, Besim Curri, Mimoza Vila, Ekrem Hajdari, Driton Kurshumliu dhe Besmir Çollaku, dhe përveç tyre, edhe tetë kandidatë të tjerë në garë për pozitën e drejtorit të Doganës.

commentFirst article
Sot mund të lexoni Shfletoni kopertinat