​Hoti: Sa më parë duhet të kalojë buxheti në Kuvendin e Kosovës - Bota Sot
​Hoti: Sa më parë duhet të kalojë buxheti në Kuvendin e Kosovës

Ekonomi

​Hoti: Sa më parë duhet të kalojë buxheti në Kuvendin e Kosovës

Më: 4 korrik 2020 Në ora: 15:22
Avdullah Hoti

Kryeministri i Kosovës, Avdullah Hoti po u bën thirrje të gjitha grupeve parlamentare që sa më parë të caktohet seanca për kalimin e buxhetit, në mënyrë që të zbatohet komplet pako e rimëkëmbjes ekonomike.

Kreu i ekzekutivit po zotohet se do të qëndrojnë afër të gjithë fermerëve, ku pjesë e rimëkëmbjes ekonomike do të jetë dyfishimi i subvencionimit në bujqësi.

Kështu është shprehur ai gjatë vizitës në Shirokë të Suharekës në fillimin e fushatës së korrje-shirjeve në Kosovë, ku ndër të tjera shtoi se ky vit ka qenë i rëndë për Kosovën, marrë parasysh situatën pandemike.

Hoti: Pres që sa më parë të kalojë buxheti në Kuvend të Kosovës

"Pres që sa më parë të kalojë buxheti në kuvend të Kosovës. Të fillojë zbatimi komplet i pakos për rimëkëmbje ekonomike, përfshi edhe për pjesën e bujqësisë. Me këtë rast i lus të gjitha grupet parlamentare, të gjithë deputetët që të organizohet në këtë kohë të pandemisë. E di që disa deputetë janë të prekur nga kjo edhe stafi i kuvendit. Por të gjejnë mënyra, dhe të gjejnë forma se si të mbahet një seancë e kuvendit, që sa më parë të kalojë edhe buxheti edhe marrëveshjet ndërkombëtare që janë të lidhura me fondin për rimëkëmbjen ekonomike", ka deklaruar Hoti.

E ministri i Bujqësisë, Besian Mustafa tha se sot janë në Shirok të Suharekës për të parë nga afër fillimin e sezonës së korrje-shireve për vitin 2020. Ai u zotua se këtë vit do të ndihmojnë në subvencionimin e grurit dhe kulturave të ndryshme bujqësore.

Mustafa:Shpresojmë që të kenë rendiment të pëlqyeshëm

"Jemi te Nisret Bajraktari, të cilit Nisretit dhe gjithë fermerëve në Kosovë iu urojmë bereqet për vitin 2020. Shpresojmë që të kenë rendiment të pëlqyeshëm, rendiment të lartë të grurit për sivjet. Ministria e Bujqësisë edhe për këtë vit do të ndihmojnë me subvencionimin e grurit dhe 26 kulturave të thera bujqësore, duke përfshirë këtu edhe pjesën e granteve që në total bëjnë 53 milionë euro grante dhe subvencione nga ministria e bujqësisë për Bujqësinë në Kosovë", tha Mustafa.

Kryetari i komunës së Suharekës, Bali Muharremaj u shpreh i kënaqur me rendimentet e këtij viti, duke apeluar te ministria që edhe një herë sa më shpejt të ndahen subvencionet.

Muharremaj:Bujqit janë të kënaqur

"Diku sillen prej 4,5 tonë deri në 7 tonë. Bujqit janë të kënaqur, unë apeloj tek ministri që edhe një herë sa më shpejt të ndahen subvencionet", u shpreh Muharremaj.

Nisret Bajraktari, i cili është pronar i "Seti Farm", tha se është i kënaqur me rendimentet e këtij viti, mirëpo jo edhe me përkrahjen e komunës dhe nivelit qendror.

Bakraktari: Presim subvencionet, komuna nuk na ka ndihmuar

"Presim subvencionet, përndryshe nga komuna deri më sot nuk kemi pasur subvencione asnjë cent, asnjë ndihmë. Por të paktën nga ministria besoj që do të shpresojmë në të ardhmen që të na ndihmojmë. Përndryshe me këtë aktivitet me u marr është gogja vështirë", ka theksuar Bajraktari.

Shfaq komentet
comments powered by Disqus
Sot mund të lexoni Shfletoni kopertinat