​Mbahet takimi përgatitor koordinues i Qeverisë së Kosovës dhe donatorëve ndërkombëtarë - Bota Sot
​Mbahet takimi përgatitor koordinues i Qeverisë së Kosovës dhe donatorëve ndërkombëtarë

Ekonomi

​Mbahet takimi përgatitor koordinues i Qeverisë së Kosovës dhe donatorëve ndërkombëtarë

Më: 6 korrik 2020 Në ora: 20:47
Hykmete Bajrami

Ministrja e Financave Hykmete Bajrami deklaroi sot se Programi për rimëkëmbje ekonomike synon të zbusë dëmet ekonomike-sociale të shkaktuara nga pandemia COVID-19 në Kosovë dhe të vendosë bazat e një platforme ambicioze përmes koordinimit me donatorët, institucionet financiare ndërkombëtare dhe agjencitë zhvillimore ndërkombëtare që operojnë në Kosovë.

Ajo këto komente i bëri sot gjatë një takimi virtual me donatorët dhe partnerët zhvillimorë, gjatë të cilit prezantoi Programin për Rimëkëmbje Ekonomike të hartuar nga Qeveria e Kosovës.

Bajrami me këtë rast shpjegoi masat e parapara, institucionet bartëse për zbatimin e masave si dhe rolin dhe kontributin e donatorëve në procesin e rimëkëmbjes ekonomike.

Pjesëmarrësit në takim e mirëpritën këtë iniciativë të Qeverisë dhe shprehën gatishmërinë e tyre për të punuar së bashku me Qeverinë e Kosovës në projekte dhe aktivitete që kanë për qëllim forcimin e ekonomisë, fuqizimin e institucioneve demokratike dhe përmirësimin e mirëqenies së qytetarëve të Kosovës.

Ndryshe, takimi i sotëm kishte karakter përgatitor për konferencën e radhës të nivelit të lartë të Qeverisë së Kosovës dhe donatorëve ndërkombëtarë që mbahet pas disa javësh.

Në mesin e pjesëmarrësve në këtë takim ishin përfaqësuesit nga BE, USAID, GIZ, UNKT (UNDP, UNICEF, etj.), ADA, Ambasada e Suedisë, FMN, BERZH, TIKA, Ambasada e Norvegjisë, Ambasada e Francës, Ambasada e Japonisë, Banka Evropiane për Investime, Banka Botërore, etj.  

Shfaq komentet
comments powered by Disqus
Sot mund të lexoni Shfletoni kopertinat