Ministrja Bajrami bën thirrje që t’i lëmë inatet personale dhe të fokusohemi në rimëkëmbjen ekonomike - Bota Sot
Ministrja Bajrami bën thirrje që t’i lëmë inatet personale dhe të fokusohemi në rimëkëmbjen ekonomike

Ekonomi

Ministrja Bajrami bën thirrje që t’i lëmë inatet personale dhe të fokusohemi në rimëkëmbjen ekonomike

Nga: A.SH Më: 11 korrik 2020 Në ora: 18:40
Hykmete Bajrami

Ministrja e Financve, Hykmete Bajrami, ka mirëpritur reagimin e Ambasadës së Shteteve të Bashkuara të Amerikës ku bëhet thirrje të gjithëve që mos të përdoret Parlamenti për sulme personale.

Sipas saj, duhet t’i lëmë pak inatet personale dhe të fokusohemi në rimëkëmbjen ekonomike dhe se do të kemi kohë për luftë politike dhe qërim të hesapeve personale kur shteti të rimëkëmbet nga pandemia.

Postimi në Facebook:

Gjithçka në funksion rimëkëmbjes ekonomike

E vetmja përplasje, e vetmja brengë, i vetmi angazhim i imi në kuadër të Qeverisë së Republikës së Kosovës është dhe do të jetë në funksion të rimëkëmbjes ekonomike dhe mirëqenies së qytetarëve. Jam dakord plotësisht me reagimin e Ambasadës së Shteteve të Bashkuara të Amerikës ku bëhet thirrje të gjithëve që mos të përdoret Parlamenti për sulme personale.

Kushdo që ka pritur që unë të hyj në mes të deputetëve kur ata fjalosen e acarohen ka pasur pritje të gabuara. Situata të tilla janë të papranueshme dhe duhet të adresohen aty ku e kanë vendin e jo në adresën time. Jam Ministre e Financave dhe i gjithë fokusi im është te adresimi i problemeve ekonomike të qytetarëve, të bizneseve, të atyre që po mbesin për çdo ditë pa punë shkaku i pandemisë.

Qytetarët po humbin për çdo ditë me secilën shtyrje që po u bëhet punëve në Parlament. Prej marrëveshjeve ndërkombëtare e deri te shtyrja e rishikimit të Buxhetit.

T’i lëmë pak inatet personale dhe të fokusohemi në rimëkëmbjen ekonomike. Do të kemi kohë për luftë politike dhe qërim të hesapeve personale kur shteti të rimëkëmbet nga pandemia.

Deri atëherë ruajeni shëndetin!

Hykmete N. Bajrami

Ministre e Financave

Shfaq komentet
comments powered by Disqus
Sot mund të lexoni Shfletoni kopertinat