Monitorimi i zbatimit të marrëveshjeve të arritura mes Kosovës dhe Shqipërisë ka qenë tema kryesore në vizitën e anëtarëve të Komisionit për Ekonomi në Tiranë. Lehtësimi i procedurave të regjistrimit të bizneseve, energjia, infrastruktura, turizmi dhe shkëmbimi i mallrave janë disa nga çështjet për të cilat është kërkuar që të ketë bashkëpunim mes të dyja vendeve. Nga pozitë e opozitë është konsideruar se kjo vizitë në fund të muajit të kaluar ka qenë përmbajtësore.
Nënkryetarja e komisionit, Jeta Statovci tha se kanë vizituar shumë institucione dhe agjenci të pavarura duke evidentuar problematikat e të dyja vendeve.
Statovci: Tema e diskutimit ka qenë monitorimi i zbatimit të marrëveshjeve në mes të dy qeverive tona
"Në kuadër të kësaj vizite, tema e diskutimit parimisht ka qenë monitorimi i zbatimit të marrëveshjeve në mes të dy qeverive tona, lehtësimin e mundësimit të bashkëpunimit në fushën e ekonomisë, ndërmarrësisë, energjisë, tregtisë. Forma të ndryshme të raportimit të agjencive të pavarura dhe rregullatorëve të tregut që i raportojnë parlamentit. Gjithashtu sfidat me të cilat përballen bizneset e të dyja vendeve, legjislacioni shqiptar në raport me kriptovalutat dhe legjislacioni në mbështetje për start-up”, ka theksuar Statovci.
E anëtarja e komisionit, Mimoza Kusari - Lila theksoi rëndësinë e lehtësimit të procedurave të regjistrimit të bizneseve.
Kusari-Lila: Të harmonizohen nenet që të ketë shkëmbim të informatave të listës së bizneseve në Kosovë dhe Shqipëri
"Gjatë vizitës në Qendrës Kombëtare të Biznesit kemi ngrit çështjen e procedurave të zgjatura, gjegjësisht pa asnjë lehtësirë të regjistrimit të filialeve të bizneseve nga Republika e Shqipërisë në Republikën e Kosovës apo anasjelltas. Është vlerësuar se ka nevojë për ndryshim legjislativ në legjislacionet respektive. Ligjet e miratuara në dy kuvendet e kanë të njëjtin emër-Ligji për Shoqëri Tregtare. Prandaj, unë propozoj që t’ia përcjellim Ministrisë së Tregtisë Industrisë Ndërmarrësisë, informacionin të cilin ne e kemi diskutuar edhe me ministren e Financave dhe Ekonomisë por edhe me Qendrën Kombëtare të Biznesit në Tiranë që të identifikohen nenet për Ligjin për Shoqëritë Tregtare të cilat duhet të harmonizohen në mënyrë që të ketë shkëmbim të informatave apo përcjellje të drejtpërdrejt të listës të bizneseve të regjistruara në Kosovë e Shqipëri”,ka deklaruar Kusari-Lila.
Po ashtu, anëtari i komisionit, Armend Muja theksoi se duhet të promovohet tregu i përbashkët dhe të ketë bashkëpunim për turizëm dhe infrastrukturë.
Muja: Ende ka vështirësi në shkëmbimin e mallrave
“E para është shkëmbimi i mallrave, ende ka vështirësi sa i përket shkëmbimit të mallrave. Ne, si Kuvend i kemi miratuar dy marrëveshje ndërkombëtare për lehtësim të këtij procesi, e njëra prej tyre është porti i Durrësit dhe një pikë doganore për portin e Durrësit. Po ashtu edhe vështirësitë që kanë bizneset e Kosovës dhe anasjelltas sa i përket tranzicionit doganor. Kjo duhet të përcjellët së bashku me doganën. Një lajm i mirë është që vitin e kaluar për Kosovën ka qenë Shqipëria niveli i parë tregtar i Kosovës”, ka vijuar Muja në Komisionin për Ekonomi.
Edhe deputeti Pal Lekaj ka theksuar se duhet të ketë një trup për të monitoruar marrëveshjet e arritura mes Kosovës dhe Shqipërisë. Sipas tij, fusha e energjisë, infrastrukturës tokësore dhe gazi duhet të jenë prioritet për të dyja vendet.
Në komisionin për Ekonomi është prezantuar edhe pjesëmarrja e deputetëve në Forumin e 27-të të Energjisë Elektrike në Athinë, për çka u tha se nuk ka pasur prezencë të fusnotës në këtë takim.
Deputetët kanë miratuar edhe raportin me rekomandime për Projektligjin për markat tregtare.
