OEK mbështet shuarjen e Organit Shqyrtues të Prokurimit

Ekonomi

OEK mbështet shuarjen e Organit Shqyrtues të Prokurimit

Më: 2 korrik 2018 Në ora: 10:10
OEK

Oda Ekonomike e Kosovës mbështet deklaratën e Ministrit të Drejtësisë Abelard Tahiri, që ka të bëjë me shuarjen e Organit Shqyrtues të Prokurorimit (OSHP).

Oda ekonomike përmes një kumtese për media, këtë organ e ka vlerësuar si një ndër organet që ka gjeneruar më së shumti amulli në vendimmarrje, politizim të skajshëm të vendimeve, promovim të tenderomanisë favorizuese, gjenerim të korrupsionit, pa-konkurrueshmësisë fer për bizneset vendore e ndërkombëtare dhe në vecanti dëmtim të imazhit të Kosovës në përmasa të mëdha.

“Duke pasur parasysh faktin se Kosova ballafaqohet me sfida të shumta që ndikojnë në ambientin e të bërit biznes dhe emëruesi i përbashkët i zgjidhjes së gjitha këtyre problemeve është sundimi i rendit dhe ligjit, sundim i rendit dhe ligjit i cili aktualisht nuk është në nivelin e dëshiruar, mendojmë se shuarja është zgjidhja më adekuate për momentin, por në të njëjtën kohë, OEK kërkon përgjegjësi për veprimet korruptive në këtë organ me qëllim të ndëshkimit dhe të rritjes së përgjegjësisë individuale dhe institucionale”, thuhet në njoftim.

Në kumtesë thuhet se ky rekomandim do të ndikojë në përmirësimin e imazhit të Kosovës, promovimin e sundimit të rendit dhe ligjit dhe përmirësimin e imazhit përballë investorëve vendor dhe ndërkombëtar.

Sot mund të lexoni Shfletoni kopertinat