Shërbimet polake të sigurisë kanë njoftuar se një biznesmen kinez dhe një polak janë arrestuar për spiunazh. Sipas një burimi, biznesmeni me shtetësi kineze, Wang Weijing, është punëtor i kompanisë “Huawei”.
Kompania ka deklaruar se është në dijeni për këtë ngjarje dhe se është duke i përcjellur zhvillimet. Kompania “Huawei” është akuzuar edhe më herët se është e lidhur me shërbimet inteligjente të Kinës.
Shefja financiare e kompanisë, Meng Wanzhou, ishte arrestuar muajin e kaluar në Kanada dhe përballet me ekstradim në SHBA për shkelje të sanksioneve kundër Iranit.
Arrestimi i dy të dyshuarve është bërë pas një hetimi të gjatë. Sipas të dhënave në internet, biznesmeni kinez është drejtor i shitjeve në një kompani, ndërsa ka punuar si atashe në ambasadën e Kinës në Poloni nga viti 2006 deri në vitin 2011, shkruan “BBC”.