“Arrestimi i 24 marinarëve ishte një incident shqetësues. Edhe një herë, apeloj për lirimin e këtyre ushtarëve, kjo është një çështje shumë e rëndësishme”, tha Merkel
Kancelarja gjermane, Angela Merkel, në një konferencë të përbashkët për media me presidentin ukrainas, Petro Poroshenko, i bëri thirrje Rusisë të liroj 24 marinarët ukrainas të arrestuar vitin e kaluar gjatë një konfrontimi përgjatë ngushticës Kerch.
“Arrestimi i 24 marinarëve ishte një incident shqetësues. Edhe një herë, apeloj për lirimin e këtyre ushtarëve, kjo është një çështje shumë e rëndësishme”, tha Merkel, pas bisedime në Berlin me presidentin ukrainas.
Rusia kapi dy anije të marinës së Ukrainës dhe një rimorkio detare së bashku me 24 anëtarë të ekuipazhit jashtë Krimesë në fund të muajit nëntor, me pretendimin se kishin hyrë në ujërat territoriale ruse.
Merkel ka theksuar se Gjermania mbetet fuqishëm e vendosur për integritetin territorial të Ukrainës dhe se do të vazhdoj përpjekjet e saj për të zgjidhur konfliktin me Ukrainën lindore, rajon pranë kufirit të Rusisë.
E pyetur për balotazhin e ardhshëm presidencial në Ukrainë dhe për të ardhmen e bisedimeve të formatit të Normandisë me Rusinë, Merkel tha se ky format është provuar të jetë i dobishëm.
“Unë besoj se duhet të vazhdojmë të punojmë në këtë format, ajo nuk përjashton bisedimet me të tjerët”, tha Merkel, duke shtuar se Gjermania dhe Franca po ashtu zhvillojnë konsultime të ngushta me partnerët tjerë të BE-së dhe SHBA-ve për konfliktin në Ukrainën lindore.
Pas aneksimit të paligjshëm të Krimesë në muajin mars të vitit 2014, udhëheqësit e Gjermanisë, Francës, Ukrainës dhe Rusisë u takuan në Normandi për bisedimet e tyre të para mbi krizën. Që atërherë, palët zhvilluan takime të ndryshme katër-palëshe të nivelit të lartë, duke i quajtur bisedime të “formatit të Normandisë”.
Udhëheqësi pro-perëndimor i Ukrainës, Poroshenko, sot vizitoi Berlinin para balotazhit presidencial të Ukrainës, të caktuar për me 21 prill.
Në raundin e parë, Vladimir Zelensky, rivali i Poroshenkos, mori 30 për qind të votave, ndërsa Poroshenko kaloi në vendin e dytë me rreth 16 për qind.
Që kur presidenti pro-rus, Viktor Yanukovych, u largua nga zyra në vitin 2014, Ukraina është përballur me një sërë problemesh, duke përfshirë aneksimin e paligjshëm të Krimesë dhe konfliktin separist në Ukrainën lindore.
