Policia franceze i ka larguar imigrantët nga lokacioni i tyre më i madh në kohën kur qeveria po përballet me presion për të marrë masa kundër imigrimit ilegal.
Forcat e sigurisë i larguan imigrantët nga kampi “Porte d’Aubervilliers”, në të cilin ndodheshin më shumë se një mijë persona. Ata jetonin në kushte të rënda, pranë një rruge të zhurmshme unazore.
Personat e zhvendosur u transportuan në një vendstrehim tjetër përmes autobusëve, ndërsa policia nuk u ballafaqua me rezistencën e imigrantëve.
Shumica e imigrantëve ishin nga Afrika Veriore, Lindja e Mesme dhe pjesët e tjera të Azisë. Ata kanë ikur nga atdheu kryesisht për shkak të luftërave të përgjakshme dhe varfërisë.
Që nga mbyllja e një kampi të madh të imigrantëve në Calais në vitin 2016, shumë imigrantë janë vendosur në Paris. Autoritetet disa herë i kanë larguar kampet ilegale, por ato janë ndërtuar përsëri disa muaj më vonë nga imigrantët.
Kryetarja e Parisit, Anne Hidalgo, ishte e pranishme gjatë aksionit të policisë në këtë kamp, shkruan “Reuters”.