Dëmet nga luftërat dhe koha në Orën simbol të Londrës kanë rritur faturën e restaurimit të saj ndërsa vitin e ardhshëm pritet finalizimi i procesit.
Kulla simbol e Sahatit në Londër po restaurohet prej tre vjetësh, por dëmtimet në strukturë duken me serioze sesa ishin menduar.
Të enjten, fatura e rindërtimit u rrit me 25 milionë dollarë pasi specialistët zbuluan mbetje asbesti, papastërti toksike dhe pasojat e vërteta të bombardimeve naziste të vitit 1941, kur një sulm nga ajri do të rrënonte godinën kryesore të parlamentit, ku është e vendosur edhe ora e njohur si Big Ben.
Edhe pse vepra infrastrukturore i mbijetoi goditjes, çatia dhe akrepat e saj mbetën të dëmtuara.
E ndërtuar 177 vite më parë, kulla që mban emrin e mbretëreshës Elizabeta ka një gjatësi prej 96 metrash.
Ajo qëndron pjesërisht e mbuluar ndërsa kambana e saj 13 tonë e rëndë nuk tingëllon prej vitesh.
Procesi i restaurimit ka përfshirë specialistë të mjeshtërive të ndryshme tradicionale, nga punuesit e gurit te prerësit e xhamave dhe orëndreqësit.
Rikthimi në identitet pritet të përfundojë vitin e ardhshëm dhe është pjesë e një projekti më të gjerë që do i kushtojë vendit rreth 4 miliardë dollarë, ku planifikohet të rinovohet plotësisht edhe godina aktuale e parlamentit.