Një anëtar i stafit të një shkolle në Reading të Anglisë është njëri prej katër pacientëve të konfirmuar si të infektuar me koronavirus.
Mësuesja kujdestare, Michelle Masters, e cila punon në shkollën “Willow Bank”, i informoi prindërit përmes një letre elektronike se një anëtar i stafit të shkollës është infektuar me koronavirusin Covid-19.
Në këtë letër, ajo kërkon nga prindërit që të qëndrojnë të qetë dhe t’i zbatojnë procedurat e rekomanduara higjienike.
“Shkolla do të mbyllet për disa ditë në mënyrë që të lihet hapësirë për pastrim të thellë dhe për t’u siguruar që rreziku nga infektimi të mbesë i ulët”, thuhet më tej në letër.
Dy nga pacientët e tjerë kishin ardhur së voni nga Italia, ndërsa një tjetër është kthyer nga Azia, tha zyrtari shëndetësor, Chris Whitty.
Numri i përgjithshëm i personave të infektuar me koronavirus në Mbretërinë e Bashkuar tashmë ka shkuar në 23.
Republika e Irlandës e raportoi rastin e parë të shtunën. Pacienti është një burrë që kishte qenë më parë në Itali, shkruan “Metro UK”.
Shumë shtete kanë marrë masa të rrepta për ta parandaluar përhapjen e mëtejme të koronavirusit. Shtetet e Bashkuara së fundi morën vendim për ndalimin e udhëtimeve nga Irani.