Me qindra mjekë kanë dhënë alarmin në Serbi për situatën e krijuar nga COVID-19.
Duke e etiketuar situatën si "fatkeqësi shëndetësore", ata kanë bërë thirrje që qeveria të heqë njësinë e saj të menaxhimit të COVID-19.
Grupi prej 350 mjekësh kanë dërguar një letër të hapur duke kërkuar hetim për vendimet që ata besojnë se shkaktuan valën e re të pandemisë.
“Braktisja totale e masave për të luftuar epideminë në periudhën parazgjedhore (mitingje, ndeshje sportive, turne, festime) shkaktoi humbjen e kontrollit të situatës epidemiologjike dhe nuk mund të justifikohet me arsye profesionale,” – shkruhet në letrën e mjekëve.
Rastet e reja me COVID-19 në Serbi nisën të shtohen pas 21 qershorit, kur u zhvilluan zgjedhjet e përgjithshme të fituara nga partia e Presidentit Aleksandar Vuçiç.
Serbia nisi izolimin e rreptë në fillim të marsit por lehtësoi kufizimet gjatë muajit maj përballë pakënaqësisë së qytetarëve për izolimin pavarësisht paralajmërimeve nga mjekët se ishte shumë herët. Vuçiç, njoftoi për rivendosjen e masave kufizuese gjatë muajit korrik për të cilat më vonë u tërhoq pasi vendimi ngjalli protesta të dhunshme në vend.
Sipas të dhënave zyrtare, në shtetin me 7 milionë banorë 491 njerëz kanë vdekur nga COVID-19. Nga gjysmë milioni testesh janë diagnostikuar 21,600 raste pozitive, por kritikët e qeverisë e kanë akuzuar atë se ka fshehur shifrat e vërteta.
Dyshime të ngjashme u shfaqën edhe në javën e parë të qershorit kur autoritetet raportuan mbi 4000 persona të shëruar brenda vetëm 72 orësh.
Sistemi shëndetësor serb po vuan nga një eksod masiv, pasi punonjësit e shëndetësisë janë larguar drejt Gjermaninsë. Sipas portalit të informacionit ekonomik “Novaekonomija.rs”, mungojnë 3.500 mjekë dhe 8,000 infermierë.
