Një makinë në Gjermani vërshoi drejt turmës së njerëzve, duke lënë shtatë persona të lënduar.
Sipas medieve të huaja, incidenti ndodhi të dielën në orët e para të mëngjesit në rajonin e Charlottenburg.
Autoritetet në Berlin thonë se disa prej këmbësorëve pësuan lëndime të rënda, derisa ekipi i shpëtimit i erdhi në ndihmë atyre.
Ndërkohë, zyrtarët deklarojnë se një hetim mbi incidentin është duke u zhvilluar mirëpo sipas tyre, incidenti nuk ka të bëjë me ndonjë motiv politik ose fetar.
Policia në Berlin tha se shoferi 24 vjeçar e humbi kontrollin e makinës, pasi i njëjti po voziste me shpejtësi.
Gazeta gjermane Bild shkroi se njëri prej të lënduarve ishte bllokuar nën makinë sakaq edhe dëshmitarët okularë pësuan shok për shkak të këtij incidenti.
