Holanda e ka shënuar javën me më së shumti raste të koronavirusit që nga fillimi i pandemisë me 13,471 raste.
Kjo shifër paraqet rritje prej 60 për qind nga java e kaluar, njoftuan autoritetet shëndetësore të shtetit të Evropës Perëndimore.
Në javën paraprake, para javës kur u shënua rekordi, në Holandë u regjistruan 8,265 raste me Covid-19, shkruan Reuters.
Përpos infektimeve, në javën e fundit u shënua edhe rritje e ndjeshme e rasteve fatale. Javën e kaluar u regjistruan 33 viktima, ndërsa në javën paraprake kjo shifër ishte 19.
Në fazën e parë të pandemisë, Holanda qëndronte nën hijen e Belgjikës, shtet që kishte shënuar numër të madh të infektimeve për një milion banorë.
Sipas faqes Worldometers, Holanda deri më tani ka regjistruar 6,291 viktima të sëmundjes Covid-19, mbi 3,000 më pak se Belgjika.
