Nuk ndodh vetëm në Shqipëri që familjarët presin teksa i afërmi i tyre ndodhet i shtruar në spital. Por prania e personave brenda institucionit u rrezikoi jetën punonjësve në një spital në Ankara. Pasi mësuan se i afërmi i tyre ndërroi jetë pasi nuk i mbijetoi një operacioni, familjarët sulmuan mjekët dhe infermierët.
Në këto kushte punonjësit u detyruan që të mbylleshin në sallën e operacioneve. Për të ndaluar hyrjen e njerëve brenda, bënë barrikadë duke qëndruar te dera.
Si të mos mjaftonin familjarët që ishin brenda, para spitalit u mblodh edhe një grup tjetër personash. Kjo situatë vijoi për disa minuta derisa ndërhyri policia dhe punonjësit e sigurisë.
Pas ceremonisë së varrimit, pjesëmarrësit në këtë sherr u ndaluan nga policia ndërsa ky veprim i tyre është denuar edhe nga qytetarët në rrjetet sociale.
