Shtatë persona janë arrestuar në lidhje me sulmin jashtë ish zyrave të revistës satirike franceze Charlie Hebdo në Paris dje njoftojnë autoritetet franceze.
Një burrë i armatosur me një thikë kasapi ka plagosur dy njerëz të premten. I dyshuari kryesor, i identifikuar si një 18 vjeçar me prejardhje pakistaneze, u arrestua afër vendit të sulmit. Policia franceze ka njoftuar se edhe gjashtë persona të tjerë janë arrestuar dhe po hetohen.
Sulmi po trajtohet si incident terrorist.
Ministri i Punëve të Brendshme të Francës, Gerald Darmain, tha se sulmi ishte “qartë një akt i terrorizmit islamik”. Ai tha se policia ka nënvlerësuar nivelin e kërcënimit në atë zonë.
Sulmi ndodhi derisa gjykimi i profilit të lartë kishte nisur kundër 14 të akuzuarve për ndihmën që ju kishin dhënë dy xhihadistëve për të kryer sulmin ndaj Charlie Hebdo në vitin 2015, ku u vranë 12 persona.
