Presidenti bullgar Rumen Radev do të duhet të vetizolohet në pritje të një testi koronavirusi, pasi ra në kontakt në fund të javës së kaluar me një oficer të lartë ushtarak i cili më vonë doli pozitiv për COVID-19, tha të martën Ministri i Shëndetësisë.
Radev shkoi në Estoni të hënën, por e ndërpreu vizitën e tij dhe u kthye të martën në mbrëmje, duke u treguar gazetarëve në aeroportin e Sofjes një rezultat negativ të një testi COVID-19 që bëri gjatë udhëtimit të tij.
Megjithatë, Ministri i Shëndetësisë Kostadin Angelov tha se Radev duhej të izolohej si një masë paraprake pas kontaktit të tij me komandantin e forcës ajrore bullgare të Premten.
Nuk ishte e qartë kur Radev do t’i nënshtrohej një testi tjetër COVID-19 ose për sa kohë do të duhej të qëndronte nën karantinë, por Presidenti tha që ai ishte pa simptoma.
"Që nga fillimi i krizës COVID-19, unë kam qenë në kontakt të vazhdueshëm me mijëra njerëz në të gjithë vendin, por jam duke respektuar rreptësisht të gjitha masat shëndetësore dhe nuk kam pasur ndonjë problem, dhe as nuk kam ndonjë" tha Radev.
