Rusia provokon në mesin e tensioneve me Ukrainën, mban stërvitje ushtarake në Krime

Evropë

Rusia provokon në mesin e tensioneve me Ukrainën, mban stërvitje ushtarake në Krime

Më: 25 janar 2022 Në ora: 15:49
Stërvitjet ushtarake të Rusisë më 25 janar 2022.

Ushtria ruse njoftoi të martën se ka nisur stërvitje ushtarake në jug të Rusisë, pranë Ukrainës, dhe në Krime, që Moska e ka aneksuar nga Kievi.

Në këto stërvitje po marrin pjesë 6,000 trupa dhe të paktën 60 avionë luftarakë, tha ushtria.

Ushtria tha se në këto stërvitje do të bëhet një kontroll i gatishmërisë luftarake, në kohën kur tensionet midis Moskës dhe Perëndimit janë rritur për Krimenë dhe Ukrainën.

“Njësitë do të praktikojnë kryerjen e një sërë detyrash, përfshirë edhe organizimin e mbështetjes gjithëpërfshirëse për stërvitje taktike”, tha Ministria e Mbrojtjes së Rusisë.

“Ushtrimet luftarake do të mbahen duke përdorur të gjitha llojet e aviacionit, divizioneve të raketave dhe grupeve të ndryshme të anijeve të Flotës në Detin e Zi dhe asaj të Kaspikut”, tha Ministria.

Avionët luftarakë dhe bombarduesit do të ushtrojnë për të kryer sulme “ndaj caqeve në distancë maksimale”, thanë agjencitë e lajmeve ruse, duke cituar Ministrinë e Mbrojtjes.

Stërvitjet do të mbahen në Gadishullin ukrainas të Krimesë, që Moska ka aneksuar dhe në rajonet në jug të Rusisë, në Rostov dhe Krasnodar.

Rusia nuk njoftoi se deri kur pritet të mbahen këto stërvitje.

Ukraina dhe Perëndimi kanë fajësuar Rusinë se po përgatitet që ta pushtojë Ukrainën pasi ka vendosur mbi 100,000 trupa në kufi.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat