Ushtarët sudanezë kanë rikthyer pallatin presidencial në kryeqytetin Khartum, duke shënuar një fitore simbolike kundër forcave paramilitare Forcat e Mbështetjes së Shpejtë (RSF) në luftën civile të vendit, raporton The Guardian.
Video të postuara në mediat sociale tregojnë ushtarë të armatosur brenda ndërtesës të dëmtuar. Ministri i Informacionit, Khaled al-Aiser, njoftoi se ushtria kishte rikuperuar pallatin dhe shkroi se "flamuri është ngritur, pallati është rikthyer dhe udhëtimi vazhdon deri në fitoren e plotë".
Përgjatë kryeqytetit mund të dëgjoheshin të shtëna të shkëputura, por nuk ishte e qartë nëse ishin nga luftimet apo nga festimet. Forcat RSF, të udhëhequra nga Gjenerali Mohamed Hamdan Dagalo, nuk e pranuan menjëherë humbjen, raporton KosovaPress.
Rikuperimi i pallatit, i cili shikon nga lart lumin Nili dhe ishte selia e qeverisë para luftës, vjen pas muajsh me përparime të vazhdueshme të ushtrisë në zonën e Khartum. Luftëtarët e RSF, që kishin kontrolluar shumicën e kryeqytetit në fazat e hershme të luftës, tani janë thuajse të dëbuar nga qyteti.
