Të paktën tre persona, përfshirë një fëmijë, janë vrarë në sulmet ruse gjatë natës pranë kryeqytetit ukrainas, Kiev, raporton BBC.
Në orët e para të së shtunës, raketat goditën lindjen e kryeqytetit dhe dëshmitarët raportuan se dëgjuan shpërthime të fuqishme vetëm disa ditë pasi sulmet në të gjithë Ukrainën vranë 21 persona.
Mbetjet e raketave të rrëzuara dëmtuan ndërtesa banimi dhe automjete, ndërsa një zjarr shpërtheu në një tjetër godinë. Kreu i administratës ushtarake të rajonit, Timur Tkachenko, tha se tre persona të tjerë u plagosën nga sulmet me raketa balistike.
Ekipet e emergjencës po përballeshin gjithashtu me zjarre në një ndërtesë dhe në një depo karburanti në Kiev, bëri të ditur kryebashkiaku Vitaly Klitschko përmes Telegramit.
Shërbimi Shtetëror i Emergjencave të Ukrainës (DSNS) publikoi pamje ku shihen garazhe, një biznes dhe një ndërtesë të përfshirë nga flakët. Autoritetet thanë se numri i viktimave dhe i të prekurve ende po përcaktohet.
Ndërkohë, presidenti ukrainas Volodymyr Zelensky ka mbërritur në Serbi për vizitën e tij të parë në këtë vend. Vizita zhvillohet në një moment kur Zelensky ka ngritur shqetësime për aftësinë e Ukrainës për t’u mbrojtur nga sulmet ruse me raketa, për shkak të pakësimit të rezervave të raketave interceptuese.
