Numri i të vdekurve nga konsumimi i locionit për trup në një rajon siberian të Rusisë ka arritur në 71, thanë zyrtarët.
Zyrtarët shëndetësorë në qytetin Irkutsk thanë se 36 burra dhe gra mbeten në spital.
Komiteti Hetues tha se locioni për trup përmbante metanol në vend të alkoolit të rregullt ose etanolit.
Metanoli mund të jetë vdekjeprurës nëse konsumohet në organizëm.
Dymbëdhjetë persona të dyshuar për shitjen e locionit janë arrestuar.
Të mërkurën, presidenti rus, Vladimir Putin, ka urdhëruar qeverinë që të miratojë ligje më të ashpra, deri në korrik të vitit 2017, për prodhimin dhe shitjen e parfumeve, locioneve dhe substancave të tjera për pastrim që përmbajnë alkool.
Helmimet me alkool zëvendësues janë të shpeshta në Rusi.
Njerëzit pinë nganjëherë substanca që përmbajnë alkool dhe janë më të lira se pijet alkoolike.
