Kryeministrja e Britanisë së Madhe, Theresa May, momentalisht është duke folur para gazetarëve në lidhje me sulmin e mbrëmshëm gjatë një koncerti të muzikës në “Manchester Arena” në qytetin britanik, Manchester, ku u vranë 22 persona dhe u plagosen 59 të tjerë.
Ajo ka thënë se policia beson se sulmi u krye nga një person. Por, ata janë duke hetuar nëse ai po vepronte i vetëm.
Policia mendon se e di identitetin e sulmuesit, por nuk dëshiron që në këtë moment ta bëjë atë publik, ka shtuar ajo.
Ajo ka thënë se policia ishte thirrur në “Manchester Arena” në orën 10.33 të mbrëmjes. Një terrorist i vetëm e ka detonuar një mjet shpërthyes në dalje të arenës, në një vend dhe kohë me qëllim që të shkaktojë lëndime në maksimum.
“Të gjitha sulmet terroriste janë të tmerrshme, por ky veçohet si sulm frikacak,” ka thënë ajo.
Përveç sulmuesit, 22 persona të tjerë kanë vdekur dhe 59 janë plagosur, të cilët janë duke u trajtuar në spital, ka thënë ajo. Shumë nga të plagosurit kanë lëndime që ua rrezikojnë jetët, ka shtuar ajo.
