66% e anëtarëve socialdemokratë votuan për koalicionin e ri me konservatorët, një rezultat shumë më i mirë se pritej. CDU e CSU reagojnë të lehtësuara e me gëzim, zëra kundër vijnë nga partia populiste e djathtë, AfD.
Anëtarët e Partisë Socialdemokrate votuan me shumicë të qartë për koalicionin e ri me konservatorët. Me këtë vendim të Partisë Socialdemokrate i jepet fund një procesi të gjatë të formimit të qeverisë në Gjermani, një proces që asnjëherë më parë nuk ka zgjatur kaq shumë. Rezultat ishte shumë më i mirë se sa pritej. Edhe pjesëmarrja në votime ishte më e lartë se ajo e vitit 2013. 78% e anëtarëve morën pjesë në votime. Më shumë se 66% e bazës së partisë e dhanë votën pro koalicionit, gjithsej 239.604 anëtarë. Ndërkohë me Jo u shprehën 33,% e anëtarëve të partisë, pra 123.329 anëtarë socialdemokratë. Kryetari i Partisë Socialdemokrate në detyrë, Olaf Scholz u shpreh në konferencën e shtypit të dielën, se shumica e partisë e ndoqi propozimin e kryesisë për të hyrë në një koalicion të ri me konservatorët. Tani kemi qartësi për qeverinë e re gjermane. SPD nuk e pati të lehtë këtë vendim, tha Scholz, që falënderoi anëtarët që votuan, por nga diskutimet e kësaj kohe ne dalim më të fortë, theksoi ai. Ditët e ardhshme pritet të bëhen publik edhe emrat e ministrave të ardhshëm socialdemokratë në kabinetin e ri.
Merkel përgëzon socialdemokratët
Pas rezultatit pozitiv të SPD-së reagoi edhe kancelarja, Angela Merkel. Ajo e falënderoi SPD-në për "rezultatin e qartë" për një koalicion me konservatorët. "E përgëzoj Partinë Socialdemokrate për këtë rezultat të qartë dhe jam në pritje të bashkëpunimit tonë për të mirën e vendit", shkroi kryetarja e partisë konservatore, CDU, Merkel në Twitter. Vota socialdemokrate i mundëson tani Merkelit mandatin e katërt.
Vlerësime pozitive - AfD kundër
Sekretari i Përgjithshëm i SPD-së, Lars Klingbeil falënderoi bazën e partisë. "Faleminderit për debatin e pasionuar të këtyre javëve. Tani duhet qeverisje e mençur dhe ta rigjenerojmë SPD-në", u shpreh ai. Zëvendëspresidenti i Bundestagut, Thomas Oppermann i SPD-së e vlerësoi rezultatin. "66% për marrëveshjen e koalicionit. Kjo është shumë më e qartë, se e kisha menduar. Anëtarët tanë nuk e patën të lehtë këtë vendim. Jam krenar për Partinë Socialdemokrate." Ndërsa kritiku më i madh i koalicionit me CDU/CSU, kreu i të rinjve socialdemokratë, Kevin Kühnert u shpreh i zhgënjyer për rezultatin. "Ne dolëm për të fituar, prandaj tani sigurisht jemi të zhgënjyer, por kritika për koalicionin e madh mbetet", shkroi ai në Twitter.
Vlerësime për votën pro të socialdemokratëve erdhën edhe nga partia konservatore, partnerja e koalicionit të ardhshëm. Sekretarja e Përgjitshme e Partisë Kristiandemokrate, Annegret Kramp-Karrenbauer shkroi në Twitter se "ky është një vendim i mirë për Gjermaninë". Ajo shprehet e gëzuar për miratimin e gjerë të SPD-së. Edhe politikani i njohur i CDU-së, Volker Bouffier e mirëpriti votën e SPD duke thënë se "kjo është një ditë e mirë për njerëzit në vendin tonë dhe të ardhmen e Gjermanisë. " Politikani tjetër kristiandemokrat, Peter Altmeier e vlerëson pozitivisht rezultatin. "Të punojmë tani për Gjermaninë dhe Europën", shprehet ai. Edhe politikani i Partisë Kristiansociale, Hans Michelbach u shpreh i lehtësuar për rezultatin. "Shumica e anëtarëve socialdemokratë i ka kërkuar qartësisht lidershipit të saj, të marrë përgjegjësi", tha Michelbach të dielën në Berlin.
Ndërsa partia populiste e djathtë, AfD e quan këtë rezultat një katastrofë për Gjermaninë. "Më së voni në vitin 2021 do të vijë fatura. Deri atëherë ne jemi partia më e fortë opozitare për një politikë të arsyeshme e të qëndrueshme në interes të qytetarëve", shkruan kjo parti në Twitter./dw
