Mijëra qytetarë kanë protestuar sot në Romë të pakënaqur me situatën në kryeqytetin italian, pasi sipas tyre, rrugët janë të mbushura me mbeturina.
Demonstruesit thanë se ishin veçanërisht të zemëruar ndaj kryetares së bashkisë, Virginia Raggi, e cila sipas tyre, nuk ka arritur t’i mbajë premtimet parazgjedhore.
"Unë jam 66 vjeç dhe nuk e kam parë kurrë këtë qytet më të ndotur, më të çorganizuar", thotë një nga demonstruesit, Franco Monti.
Kurse kryebashkiakja, Virginia Raggi, e cila është anëtare e Lëvizjes Pesë Yje, thotë se ka nevojë për më shumë kohë për t’i zgjidhur problemet e grumbulluara.
Për shkak të grevës së pastruesve të qytetit, janë grumbulluar mbeturinat në qytet dhe qytetarët janë të pakënaqur me këtë.
Po ashtu protestuesit kanë treguar se janë të pakënaqur me transportin e qytetit dhe shërbime të tjera komunale.
