Kremlini: Ka pasur presion për zgjedhjen e kreut të Interpol-it

Evropë

Kremlini: Ka pasur presion për zgjedhjen e kreut të Interpol-it

Më: 21 nëntor 2018 Në ora: 15:51
Zëdhënësi i Kremlinit, Dmitry Peskov.

Kremlini, përmes zëdhënësit Dmitry Peskov, shprehu keqardhje që kandidati rus nuk e fitoi postin e udhëheqësit të Interpol-it.

Organizata ndërkombëtare e policisë zgjodhi të mërkurën president jugkoreanin Kim Jong-yang.

Kim u zgjodh nga 194 shtetet anëtare të Interpol-it në një takim në Dubai.

Ai e mundi rusin Alexander Prokopchuk, i cili ka qenë favorit për të fituar.

Megjithatë, ka pasur shqetësime se Prokopchuk do ta shfrytëzonte rolin e presidentit për të shënjestruar kritikët e presidentit rus, Vladimir Putin.

Pas votimit të mërkurën, Kremlini tha se ka pasur “presion të qartë nga jashtë” për zgjedhjen e kreut të ri të Interpol-it.

Moska tha se Prokopchuk do të vazhdojë të shërbejë si zëvendëspresident i Interpolit dhe do të ndihmojë në forcimin e "pozitës së organizatës në komunitetin ndërkombëtar të policisë".

Sot mund të lexoni Shfletoni kopertinat