Presidenti i Komisionit Evropian Jean-Claude Juncker tha sot se pavarësisht dështimit të kryeministres Theresa May për të siguruar mbështetje të mjaftueshme për ratifikimin e marrëveshjes për tërheqje në Parlamentin britanik, nuk ka mundësi për ri-negocimin e Brexit.
Juncker në samitin e liderëve të BE-së në Strasburg tha se "nuk ka vend për negociata të reja" në lidhje me largimin e Britanisë së Madhe nga Bashkimi Evropian.
"Nuk ka asnjë mundësi për ri-negociata, kjo është e mirë dhe e vetmja marrëveshje e mundshme, por ka ende vend për sqarime dhe interpretime të mëtejshme", tha Juncker.
Ai paralajmëroi se do të takohet me kryeministren May pasi kjo e fundit shtyri votimin për marrëveshjen e Brexit për shkak të mungesës së votave.
Sipas tij, në debatin mbi përgatitjen për seancën e Këshillit Evropian më 13 dhe 14 dhjetor Brexit edhe një herë do të jetë temë e udhëheqësve të BE-së dhe në samitin e kësaj jave në Bruksel.
“Marrëveshja nuk do të tërhiqet. Këtë e dinë të gjithë dhe për këtë arsye nuk ka vend për ri-negocimin," përsëriti njeriu i parë i Komisionit Evropian.
