Aleanca Kosova e Re, dega në Ferizaj, sot ka mbajtur takimin me strukturat e degës, në të cilin u rikonfirmua që AKR në Ferizaj mbetet e unifikuar dhe e fuqishme.
Gjatë këtij takimi, sipas një njoftimi, koordinatori i degës, Ibrahim Hyseni, deklaroi që Aleanca Kosova e Re, dega në Ferizaj, është e gatshme për këto zgjedhje të jashtëzakonshme parlamentare.
Ai po ashtu ka kërkuar angazhim shtesë nga strukturat e degës, duke përfshirë kryesinë e degës, forumet brenda partisë dhe nëndegët në fshatrat e Ferizajt.
Koordinatori Hyseni ka njoftuar po ashtu që dega është unike dhe e kompletuar me struktura, kështu nuk ka nevojë për zgjedhje të brendshme, kurse dy pozitat e lëna bosh në kryesi do të plotësohen pas procesit zgjedhor për kuvendin e Kosovës.
Po sipas njoftimit, nga niveli qendror strukturat e degës së AKR-së në Ferizaj, i përshëndeti koordinatori i shtabit zgjedhor, Selim Pacolli, i cili ka falënderuar degën për kontributin e dhënë në fuqizimin e vlerave liberale në Ferizaj.
Ai po ashtu ka njoftuar degën me aktivitetet e partisë në nivel qendror si dhe me përgatitjet që po bëhen në kuadër të procesit të zgjedhjeve të jashtëzakonshme parlamentare.
Siç thuhet tutje në njoftim, ditëve në vazhdim koalicioni AKR-NISMA do të prezantojnë programin e tyre politik për zhvillimin e vendit, program ky i cili do të jap zgjidhje për problemet e mëdha që ka sot Kosova dhe qytetarët e vendit, duke përfshirë edhe komunën e Ferizajt.
Në takimin me strukturat e degës së AKR-së në Ferizaj morën pjesë përfaqësues nga kryesia qendrore e partisë, duke përfshirë sekretarin e partisë, Vesel Makolli, koordinatorin e shtabit zgjedhor, Selim Pacolli, kryetarin e kuvendit të partisë, Fatmir Matoshi, deputetin, Islam Pacolli, shefin e kabinetit të zv/kryeministrit Pacolli, Jetlir Zyberaj, e zv/ministrat Shkodra, Selmani e Avdullahu.
