Gjatë muajve të fundit një familje në Talinoc të Muhaxherëve në Komunën e Ferizajt po përballet me dëme të vazhdueshme që po u shkarkohet nga zjarri. Është hera e pestë që kësaj familje po i ndezët zjarri brenda shtëpisë.
Me gjithë intervenimin e shpejtë të zjarrfikësve, të hënën pasdite, zjarri ka përfshirë pjesën më të madhe të shtëpisë duke shkaktuar dëme të mëdha. Njëri nga zjarrfikësit ka marrë lëndime të lehta derisa po e lokalizonte zjarrin.
Shefi i ndërrimit të zjarrfikësve në Ferizaj, Milazim Musliu, ka thënë për Telegrafin, se është hera e psetë brenda pak muajve që të njëjtës shtëpi po i vendoset zjarri.
‘’Ne i bëjmë raportet tona dhe me këtë rast tashmë është duke u marrë edhe Policia e Kosovës, pasi që është shqetësuese se për herë të pestë kjo shtëpi po përfshihet nga zjarri. Megjithatë ne si zjarrfikës po intervenojmë me urgjencë për fikjen e zjarrit. Kësaj here zjarri ka përfshirë pjesën më të madhe të shtëpisë dhe dëmi është mjaftë i madh’’, ka thënë Musliu.
Anëtarët e kësaj familje nuk kanë dashur të flasin lidhur me rastin, ndërkaq muaj më parë atyre ua patën rinovuar shtëpinë disa bamirës dhe ishte në fazën finale për mobilimin e saj.
Agon Zhinepotoku, njëri prej organizatorëve për renovimin e kësaj shtëpie, ka thënë se është e dhimbshme se si kjo familje po përballet me këto dëme të mëdha për pesë herë me radhë.
‘’Shumë e dhimbshme të digjet për të pestën herë shtëpia a familjes S. në Talinovc të Muhaxherëve. Fatmirësisht fëmijët janë mirë, lëndime të lehta ka e zoja e shtëpisë dhe një zjarrfikës. Kur ne po bëheshim gati t’i sillnim mobiliet të gjitha, pasi që morëm përsipër ta kompletojmë, sot i doli flaka përsëri. Po na duhet një banesë dy dhoma me qera. Dhimbje, ama shumë shpresoj se do të ketë shpresë për këtë familje, se Ferizaj ka zemër të madhe e shumë bamirës që do t’i dalin ndihmë kësaj familje’’, ka thenë Zhinepotoku.
