Filmi “Mbijetesa dhe Shkolla“ mirëpritet edhe nga publiku gjerman në Weimar të Geothes

Filma

Filmi “Mbijetesa dhe Shkolla“ mirëpritet edhe nga publiku gjerman në Weimar të Geothes

Më: 27 nëntor 2021 Në ora: 09:35
Filmi “Mbijetesa dhe Shkolla“

Filmi Dokumentar „Mbijetesa dhe shkolla“ i producentit dhe skenaristit Nuhi Bytyçi, me regji të Ilir Kabashit dhe drejtor fotografie të Bekim Qyqallës, është prezantuar mbrëmë edhe në Return International Art Festival në Weimar të Republikës së Turingenit në Gjermani, në qytetin e poetit, shkrimtarit dhe shkencëtar të njohur gjerman e botëror Johann Wolfgang von Goethes.  

Ky film, i cili ka për temë sakrificën e jashtëzakonshme të popullit shqiptar në Kosovë në periudhën e luftës për liri e pavarësi, në veçanti dramën e fëmijëve, arsimtarëve, prindërve dhe të luftëtarëve të lirisë për të organizuar funksionimin e shkollës shiqpe edhe në rrethana lufte, pikërisht në malet e Berishës. 
Në këtë film janë prezantuar filmime dokumentare të kohës, të vjeshtës 1998 që na japin më së miri këtë histori ndryshe të luftës, një dëshirë të nxënësve dhe arsimtarëve për të mbajtur gjallë shpresën për shkollë, dije  dhe mbijetesë.

Fate njerëzish që shihen në harkun më tepër se 22  vjeçar në xhirime autentike të kohës dhe të tashmes në rrethana krejtësisht të ndryshme na shpalosin më së miri fatin gri të njeriut. 

E veçanta e këtij filmi është se Producenti dhe skenaristi i këtij filmi Nuhi Bytyçi, është ideator i filmit, sepse ai gjatë kohës së luftës, në kohë reale, si gazetar ka qenë dëshmitar,  ka përjetuar dhe e ka aranzhuar xhirimin e shkollës së maleve nga kameramani Abaz Zeka në shtator të vitit 1998. Qysh atëherë e ka nisur përgatitjen e  skenarit për këtë film dokumentar, i cili është realizuar pas më shumë se dy dekadave  të rrugëtimit të popullit shqiptar të Kosovës  për liri, pavarësi, për dije dhe civilizim evro-perëndimor. Mesazhi kryesor i filmit është arritur, duke krijuar emocione edhe te shikuesit dhe kineastët gjermanë e të tjerë, ka pohuar Bytyçi pas shfaqjes së këtij dokumentari në Weimar.  

Ai ka falënderuar Drejtuesen e Festivalit Ndërkombëtar Return Art Weimar 2021, Zonjën Mahsa Nejadfallah dhe jurinë e tij profesionale, që e pranuan pa hezitim selektimin dhe prezantimin e filmit të vetëm nga Kosova në këtë festival para publikut gjerman dhe kineastëve të shumë vendeve të botës.  

Festivali në Weimar po zhvillohet nën moton “Arti pa Kufij” me qëllim prezantimin e vlerave të arteve dhe artistëve në fusha të ndryshme: në film, fotografi, posterë dhe vepra të tjera nga mëse 80 vende nga mbarë bota. Nga Shqipëria u prezantua filmi dokumentar “Gurë”.

Veprimtaria përmbyllëse e Return International Art Festivalit në Weimar, ku do të shpallen fituesit, do të mbahet më 28 nëntor në Bankën Qendrore të këtij qyteti të lashtë gjerman.

Image
Filmi Dokumentar „Mbijetesa dhe shkolla“
commentFirst article
Sot mund të lexoni Shfletoni kopertinat