“Formula 1 është Ferrari dhe Ferrari është vetë Formula 1”, është deklarata nga ish-pronari i Formula 1, Bernie Ecclestone, që ka ndërhyrë sërish në polemikat që kanë lindur së fundi mes pronarëve të rinj dhe “kokëkuqes”. Ky debat ka nisur pas deklaratës së pronarëve të Liberty Media se kanë ndërmend të ndryshojnë totalisht sportin më të famshëm dhe të bukur të automobilizmit, duke e orientuar drejt marketingut dhe kthyer në biznes. Kjo ide e tyre ka hasur në pengesat e disa prej skuadrave kryesore të këtij sporti (Ferrari, Mercedes e Renault), që janë edhe furnizuesit kryesorë të makinave të vogla me motorët e tyre.
