Reshjet e dëborës kanë mbuluar sot qytetin e Gjirokastrës, duke i prishur planet skuadrës së Luftëtarit. Skuadra bluzi anuloi pak ditë më parë zhvillimin e minifazës përgatitore në Greqi, teksa planifikoi që të stërvitej në Gjirokastër.
Moti i keq dhe reshjet e dendura të dëborën e bëjnë të pamundur zhvillimin e stërvitjes dhe me shumë gjasa pritet që skuadra të ngujohet në kalçeto, deri në përmirësimin e motit.
Stadiumi i qytetit të Gjirokastrës është i mbuluar i gjithi nga dëbora, teksa temperaturat shkojnë deri në -3 gradë celsius.
Nuk kanë munguar as videot e postuara në “Instagram” nga futbollistët e Luftëtarit, të cilët kanë pasqyruar dëborën e dendur që ka mbuluar qytetin.