Luftëtari nuk po kalon ditët më të lumtura. Klubi ka shumë vështirësi, pasi po përballet me probleme të mëdha financiare dhe merkatoja deri tani ka qenë e vakët. Zyrtarët e klubit nuk kanë faj, stafi teknik jo e jo, e aq më pak lojtarët. Fatura për gjendjen aktuale i faturohet presidencës gjirokastrite.
Situata momentalisht është shumë e vështirë, pasi faza përgatitore ka ngecur. Reshjet e dëborës kanë bllokuar stërvitjen e ekipit. Trajneri Gentian Mezani duket i dorëzuar tashmë, nuk ka nevojë as për të nxjerrë flamurin e bardhë, pasi mjafton e bardha e dëborës për të kuptuar realitetin.
I gjendur përballë kushteve të tilla, numri një i stolit, referuar lajmit të Supersport, po mendon largimin nga drejtimi. Vlonjati e ka theksuar dhe në intervistat e mëparshme se nëse situata nuk zgjidhet nga drejtuesit e klubit atëherë nuk do të vazhdonte të ishte më në krye të skuadrës.
