Kampionët në fuqi të NBA kanë triumfuar përballë Dallas Mavericks.
Në shtatë ndeshje të luajtura në NBA, skuadrat që kryesojnë konferencat respektive arritën të triumfonin dhe të ruanin pozicionet e tyre.
Golden State Warriors nuk e patën të lehtë ndaj Dallas Mavericks, por në fund arritën të merrnin një fitore të çmuar 119-114, që njëherësh është e katërta radhazi për kampionët.
Vazhdon të shkëlqejë për Dallasin Luka Donçiq, që realizoi 26 pikë, por përballë Stephen Curryt, që e mbylli takimin me plot 48 pikë, 33 prej të cilave me gjuajtjet nga distanca, talenti i madh slloven nuk erdhi shumë në shprehje.
Fitore e ngushtë edhe për Denver Nuggets ndaj Portland Trail Blazers, me rezultat116-113. I pandashëm për Nuggets, Nikola Jokiq, me 40 pikë, 8 asistime dhe 10 kërcime, por nuk duhet nënvlerësuar edhe ndihma e madhe që dha Jamal Murrey me 24 pikët e tij.
Një ndeshje maratonike u zhvillua mes Washington Wizards dhe Toronto Raptors. Vetëm pas dy vazhdimeve skuadra kanadeze arriti të triumfonte me dy pikë diferencë 138-140 në kryeqytetin amerikan.
Koha e rregullt, në fakt, përfundoi 124-124, por edhe në përfundim të pesë-minutëshin e parë shtesë nuk doli një fitues (131-131).
Vazhdimin e dytë e nisi më mirë Washingtoni, por një tre pikësh i Serge Ibakas 15 sekonda para fundit u dha suksesin Raptors. Në Capital One Arena shkëlqyen Kawhi Leonard me 41 pikë e 11 kërcime dhe Bradley Beal i Wizards, me 43 pikë, 15 asistime dhe 10 kërcime, por përtej statistikave më të mira të “yllit” të Wizards, festa ishte për kundërshtarin e tij të Raptors.
Humbje turpëruese për Los Angeles Lakers, që ende nuk mund të llogarisin në LeBron James të lënduar.
Këtë herë skuadra kaliforniane u mposht nga ekipi më i dobët në ligë këtë stinor, Cleveland Cavaliers me rezultat 95:101.
Për ta bërë më të vështirë këtë humbje, duhet cekur se Cavs vinin nga një seri prej 12 humbjesh radhazi dhe arritën të ndalnin këtë seri pikërisht në Staples Center.
