Real Madridi me shumë vështirësi shënoi fitore me rezultat 2:0 në duel me Sevillën, në ndeshjen derbi të javës së 20-të të Kampionatit të Spanjës.
Futbollisti brazilian Casemiro me një goditje nga rreth 30 metra shënoi eurogol në këndin e epërm të majtë të portierit të Sevillës, Vaclik pikërisht në minutën e 78-të. Në minutën e 90+2, kroati Luka Modriç, futbollisti më i mirë në botë, vulosi fitoren e madhe me rezultat 2:0. Tri pikë që peshojnë shumë për madrilenët dhe e mbajnë në hap për titullin e kampionit, kurse Sevilla ka qenë e pafat. Në fakt, një ndeshje me dy futbollist të përgjakur në pjesën e parë.
Tetë minuta para përfundimit të 45 minutave të para ka ardhur një përplasje e frikshme mes Luka Modriç dhe Franco Vazques. Të dy lojtarët kanë patur nevojë për ndërhyrjen e mjekëve pas të çarave të pësuara në kokë. Reali ngjitet në vend të tretë me 36 pikë, ka tri më shumë se rivalin një pozitë më poshtë.