Në ndeshjen që skuadra e Manchester United do të luajë ndaj Crystal Palace të mërkurën në kampionat, trajneri Ole Gunnar Solskjaer do të ketë 9 mungesa. Në këtë sfidë pritet të jenë titullarë Romelu Lukaku dhe Alexis Sanchez. Ata ishin dy sulmuesit titullarë të United në fillim të këtij sezoni, por që dështuan nën urdhërat e Jose Mourinho.
Të dy, gradualisht, humbën vendin si titullarë. Gjithsesi, ndaj Palace, për shkak të mungesave që Solskjaer ka, do të hedhë në fushë që nga minuta e parë si Lukaku ashtu dhe Sanchez. “Kam shumë nevojë për ata të dy. Sidomos në këto momente, kur duelojmë për të kapur vendin e katërt dhe të kualifikohemi në Champions League”, tha Solskjaer.
“Të dy janë në formë dhe janë kampionë të mëdhenj. Ky është një shans i artë për të treguar se nuk e kanë humbur shkëlqimin. Unë kam një ekip të mirë dhe kam besim tek të gjithë lojtarët që kam në dispozicion”, deklaroi trajneri norvegjez.