Sulmuesi suedez ka luajtur për një vit e gjysmë në Premier Ligë. Zlatan Ibrahimoviç ka luajtur në të gjitha ligat më të forta evropiane dhe para se të transferohej në SHBA te skuadra e Los Angeles Galaxy, ai ka provuar edhe Premier Ligën e Anglisë, ku ka bartur fanellën e Manchester United.
Megjithatë, Ibra nuk ka mbetur shumë i impresionuar nga futbolli anglez, që sipas tij është i mbivlerësuar.
“Futbolli në Angli ishte pikërisht ashtu siç e mendoja”, ka deklaruar Ibra për Mirror.
“Atje luhet futboll i shpejt me tempo të lartë, por mendoj se kualiteti i ligës është i mbivlerësuar”.
“Kur them i mbivlerësuar, mendoj për aspektin teknik. Megjithatë atje luhet futboll i mirë dhe nëse nuk e ke shpejtësinë dhe intensitetin e duhur, nuk mund të luash”.
“Nuk pendohem që kam luajtur aq shkurt në Premier Ligë, por imagjinojeni sikur të kisha shkuar atje 10 vite më parë”, ka përfunduar suedezi.
