Tifozët e Liverpoolit kanë mbetur sërish të habitur me Jurgen Kloppin për vendimin për të mos e inkuadruar në lojë Shaqirin, ani pse “Redsat” kishin nevojë për të pasi ishin afër të dështonin kundër Tottenhamit, që fituan vetëm me një autogol në minutën e 90′.
Ylli shqiptar i Liverpoolit, Xherdan Shaqiri, nuk u paraqit as në kryendeshjen e xhiros në Premierligë ndaj Tottenhamit duke nxitur sërish reagim të madh të tifozëve të “Të Kuqve”.
Pavarësisht se ishte në formë të mirë, Shaqiri nuk është paraqitur për skuadrën e Jurgen Kloppit që nga 24 shkurti, në barazimin me Manchester Unitedin. Ai ka qenë në bankën rezervë në gjashtë ndeshjet e fundit të Liverpoolit.
Edhe pse Liverpooli fitoi 2-1 ndaj Tottenhamit, rrjeti social “Twitter” është mbushur me kritika për Kloppin pse nuk po e inkuadron Shaqirin.
“Çfarë i ka bër Shaqiri Kloppit që e ka zemëruar e nuk po luan?”, “Klopp, të lutem trego pse Shaqiri nuk po luan”, “Çfarë dreqin ka bërë Shaqiri?”, janë disa nga postimet e shumta të tifozëve të cilët nuk po i kuptojnë arsyet pse reprezentuesi i Zvicrës nuk po luan fare.
Në 21 paraqitje deri tash për Liverpoolin në Premierligë, Shaqiri ka shënuar gjashtë herë.
