Momente frike për mbrojtësin brazilian dhe familjen e tij.
Plaçkitësit në Paris kanë vënë në shënjestër familjen e Thiago Silvas e cila ka pasur momente të rënda gjatë ditës së martë.
Sikurse raporton prestigjiozja spanjolle AS, djali dhe tezja e bashkëshortes së tij ishin “viktimat” e një grabitjeje me dhunë.
Në momentin kur djali i Thiago Silvas po shoqërohej nga tezja e gruas së futbollistit në një ndeshje në Creteil, një motor me dy persona u ndal para veturës së tyre.
Grabitësit, të cilët i kishin studiuar lëvizjet e familjarëve të brazilianit, zbritën nga motori dhe i detyruan me dhunë që t’u dorëzonin një orë Gucci me vlerë të madhe, por mbi të gjitha e kanë tmerruar familjaren dhe djalin e Thiago Silvas.
Bashkëshortja e mbrojtësit brazilian, Isabella menjëherë e ka denoncuar grabitjen në polici dhe ka shprehur publikisht shqetësimin e saj.
“Ndjenja që mbizotëron është pasiguria. Ne kurrë nuk kemi refuzuar ndonjë fotografi apo autograf për tifozët, shpresojmë që policia t’i gjejë hajdutët”, – tha ajo.