Roma vazhdon pa pushim kërkimet për trajnerit të ardhshëm (pa ia mbyllur plotësisht dyert një qëndrimi të mundshëm të Claudio Ranieri). Shumë do të varet nga kualifikimi në Ligën e Kampionëve, për sezonin e ardhshëm. Mediat italiane i mëshojnë idesë se emri më konkret për momentin është ai i Gian Piero Gasperinit, pasi Antonio Conte iu tha publikisht "jo" verdhekuqve.
Sidoqoftë, ka edhe një emër tjetër, që i ngacmon kryeqytetasit këto ditë. Fjala është për Arsene Wenger, siç raportohet nga “Corriere dello Sport”. Trajnerin veteran e ka takuar Franco Baldini shpesh në Londër, i cili është një admirues i madh i francezit. Konsulenti i Pallotta e njeh mirë dhe e di se kualifikimi në Ligën e Kampionëve do të ishte thelbësor për ardhjen e tij.
Nga ana e tij, francezi ka deklaruar ditët e fundit se është gatshi të kthehet në trajnim, pas një viti pushimi. Për momentin nuk ka negociata të vërteta, por nga fundi i sezonit do të punohet më qartë në këtë drejtim. As emrat e Paulo Fonseca, trajnerit portugez të Shakhtar Donetsk dhe Laurent Blanc, pa stol prej pothuajse tri vitesh, nuk duhet të hiqen nga lista në këtë kohë.