E ardhmja e Gareth Bale tek Real Madrid është në një pikëpyetje të madhe.
Lojtari uellsian nuk ka arritur të bind trajnerin francez, Zinedine Zidane, me paraqitjet e tij dhe ai lehtë mund të largohet nga ‘Santiago Bernabeu’.
Spekulimet për të ardhmen e Bale po rriten çdo ditë e më shumë, me zërat që e lidhin me një kalim në Premierligë.
Lojtari ishte lënë jashtë skuadrës ‘Los Blancos’ në ndeshjet e fundit kundër Villarreal dhe Real Sociedad, dhe agjenti i tij Jonathan Barnett nuk ka qenë aspak i kënaqur me këtë.
Pas gjithë këtyre ngjarjeve, gazetarët kanë pyetur trajnerin Zidane nëse Bale do të jetë pjesë e skuadrës edhe sezonin e ardhshëm.
“Bale do të jetë në listën e skuadrës nesër. Unë nuk do të them nëse ai do të luajë ose jo. Do ta shihni nesër” ka thënë fillimisht Zizou.
“A mund të jetë kjo ndeshja e tij e fundit me fanellën e Real Madrid? Nuk e di. Nuk mund ta them” ishin fjalët e trajnerit.
Gareth Bale ka startuar në vetëm 29 nga 42 paraqitjet që ka pasur këtë sezon me skuadrën nga kryeqyteti i Spanjës.