Diçka vërtetë e tmerrshme ka ndodhur në ligën e femrave në fundjavën që kemi lënë pas.
Në ndeshjen mes Jakovës dhe Bazelit të Kaçanikut, është shkaktuar një ndërhyrje totalisht jashtë rregullave të futbollit në futbollisten, Diellza Hysenin.
Futbollistja e KFF Jakova e ka goditur qëllimisht futbollisten e Bazelit, Diellëza Hyseni, duke tentuar t’ia thyente këmbën.
Në një video të publikuar në rrjetet sociale, ndëgjohet se futbollistja e Jakovës urdhërohet të ndërhyjë ashpër në Hysenin, gjë e cila praktikohet më pas.
Futbollistja, Diellza Hyseni pranoi një dëmtim dhe nuk vazhdoi ndeshjen. Në një prononcim ajo zbulon detaje se çfarë ndodhi në këtë ballafaqim.
“Gjendja ime është është e mirë, kam pak dhimbje – por jo diçka serioze”, tha fillimisht Hyseni duke konfirmuar shkallën e lëndimit.
Hyseni më pas ka treguar se cili ishte motivi i ndërhyrjes brutale nga kundërshtarja e saj.
“Shkaku që unë mora një ndërhyrje të tillë ishte – sepse gjyqtari akordoi një penallti për ne. Nuk e di se kush ka dhënë urdhër që të më thyhen këmbët – por jam e sigurt që ndonjë prind apo ndoshta edhe ndonjë ndihmës trajner”, vazhdoi ajo.
“Nuk ndihem aspak mirë kur e shikoj momentin, sepse kam mundur të pësojë ndonjë thyerje të këmbës apo edhe të lëndoja ligamentet, por më ndihmoi Zoti”, përfundoi ajo.
