Është prezantuar projekti për stadiumin e ri kombëtar që pritet të fillojë ndërtimin së shpejti në afërsi të Drenasit. Kryetari i Komunës së Drenasit, Ramiz Lladrovci ka reaguar përmes një postimi në rrjetin social Facebook.
“Projekti i Stadiumit nacional me objektet ndihmëse, i cili sot u prezantua për opinion, shënon suksesin e radhës për komunën tonë, realizim i premtimit tonë, Drenasi me stadium nacional. Stadiumi nacional, me vlerën e vet si objekt sportiv me standardet e FIFA-s, do të jetë arenë e luanëve tanë, dëshmitarë të fitoreve sikur ato të deritashme. Aty, ne do të ofrojmë mikpritje tradicionale, por fitoret do të jenë tonat”, ka shkruar Ramiz Lladrovci.