Ndryshime në Superligë, tani tre ekipe rrezikojnë rënien - Bota Sot
Ndryshime në Superligë, tani tre ekipe rrezikojnë rënien

Futboll

Ndryshime në Superligë, tani tre ekipe rrezikojnë rënien

Më: 6 korrik 2019 Në ora: 09:14
Komiteti Ekzekutiv pranë Federatës Shqiptare të Futbollit

Komiteti Ekzekutiv pranë Federatës Shqiptare të Futbollit ka marrë një vendim të rëndësishëm, sa i përket sezonit të ri të Kategorisë Superiore, që pritet të startojë më datën 24 gusht.

Bëhet fjalë për një ndeshje Play Out, që vendi i tetë i renditjes do ta luajë për të siguruar mbijetesën, përballë fitueses mes vendeve të dyta të grupeve A dhe B të Kategorisë së Parë.

Deri tani binin nga Superiorja dy skuadra dhe ngjiteshin fitueset e grupeve përkatëse të Kategorisë së Parë, ndërsa këtë sezon edhe vendi i tetë nuk do ta ketë të sigurt mbijetesën, ndërsa vendet e dyta të grupeve në Kategorinë e Parë do të shpresojnë deri në fund për ngjitjen në Superligë.

Kjo lëvizje pritet ta bëjë edhe më interesante garën në Kategorinë e Parë, që shpesh mbyllej pasi skuadrat në grupet përkatëse shkëputeshin me pikë dhe binte interesi për ekipet e tjera.

Ndërkohë, po sa i përket Kategorisë së parë, këtë sezon do të bien nga dy skuadra për çdo grup, dhe do të ngjiten vetëm dy të tjera, me qëllim që në sezonin 2020-2021 të ulet numri i ekipeve që garojnë, nga 20 në 18.

Por në Komitetin Ekzekutiv u vendos që të mos ndryshohet numri i të huajve të lejuar në fushë për skuadër, pasi klubet kishin kërkuar që të rritej nga 4 që është aktualisht në 5.

Gjithashtu, për të shmangur problemet financiare të reflektuara në sezonin e fundit, Komiteti Ekzekutiv ka paralajmëruar klubet se duhet të mbyllin detyrimet brenda 31 korrikut, për t’u licencuar për të garuar në Kategorinë Superiore.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...