Trajneri i Manchester Unitedit, Ole Gunnar Solskjaer, thotë se klubi është duke punuar për transferimin e një apo dy lojtarëve gjatë këtij afati kalimtar të verës, në tentim për ta përforcuar skuadrën për sezonin e ardhshëm.
“Djajtë e kuq” tashmë veçse i kanë shtuar në skuadër dy futbollist e rinj të talentuar anglezë – Daniel James dhe Aaron Wan-Bissaka – mirëpo kjo mund të mos jetë e gjitha për anglezët.
Spekulimet sugjerojnë se do të kenë edhe transferime të tjera, pasi që mesfushori i Sportingut Bruno Fernandes dhe qendërmbrojtësi i Leicester Cityt Harry Maguire raportohet se janë afër transferimit në “Old Trafford”.
Solskjaer nuk e zbuloi identitetin e lojtarëve të cilët klubi është duke i vëzhguar, mirëpo shtoi se klubi është duke e bërë të pamundurën në tenim për të sjellë në “Teatrin e Ëndrrave” lojtarë sa më të talentuar.
“Epo mirë, siç kam thënë, ne jemi duke punuar për transferimin e një apo dy lojtarëve. Synimi im është se ne duhet të bëhemi gati për këto ndeshje dhe për seancat stërvitore”, ka thënë Solskjaer, para ndeshjes të së shtunës kundër Interit.