Manchester United pritej të ndryshonte shumë nga ekipi i sezonit të kaluar, por deri tani nuk është bërë thuajse asnjë lëvizje e bujshme. Trajneri Ole Gunnar Solskjaer nuk është aspak i kënaqur, ndërsa tani mendon të afrojë dy yje në skuadër.
Ivan Perisic i Interit dhe Paulo Dybala i Juventusit janë dy të preferuarit e tij. I pari nuk pëlqehet nga Antonio Conte dhe trajneri i ri i zikaltërve e ka bërë të ditur se nuk e sheh të përshtatshëm për skemat e tij. Kroati dëshiron largimin nga Italia dhe Premier League mund të jetë kampionati i duhur për të.
Dybala mund të largohet nga Juventusi, pasi ka kaluar një sezon të vështirë. Argjentinasi ka humbur rolin e titullarit absolut dhe te kampionët e Italisë është sfumuar rëndësia e tij. Ai nuk është më i paprekshëm dhe "Djajtë e kuq" duan të shfrytëzojnë momentin e vështirë.
