Futbollisti i kombëtares së Kosovës U-21, Mirlind Daku ka ndërruar ambient. Daku është transferuar tek skuadra e njohur shqiptare, Kukësi.
Sulmuesi 21-vjeçar ka arritur marrëveshje me Kukësin – pasi kaloi një sezon tek skuadra e Osijekut në Kroaci.
Megjithatë, sulmuesi ka nënshkruar marrëveshjen në formë huazimi.
Ky është njoftimi i klubit të Kukësit:
“Klubi njofton arritjen e marrëveshjes me ekipin kroat të Osijek për futbollistin Mirlind Daku.
Shtatlarti vjen në formë huazimi te skuadra jonë, me të drejtë blerjen e kartonit të tij.
21-vjeçari, i cili mbron ngjyrat e “Dardanëve” U-21, ka luajtur me skuadrën e Hajvalia dhe Llapit në Kosovë.
Gjithashtu, Daku është aktivizuar në shtatë ndeshje me Kosovën U-21, ku është dhe autor i dy golave.
Futbollisti i datëlindjes 1998, luan si sulmues qendre dhe sezonin e shkuar u aktivizua 15 herë për Osijekun në Kroaci, duke shënuar dy gola”.
